“تشكيل من التراب” عبد العالي الوالي ــ المغرب

ضمن مواد العدد الورقي الأول لمجلة عبور

التراب اللي يهز الترابْ

الأرض بلا ترابْ تامرْ

ماعندها قلب

القبر حفرة د التراب من روحها كتشرب

اللوح وقفة شديدة للتراب

فوجه الزمان

….

هاد التراب بشحال من وجه كيبانْ؟

…

يمتَّنْ الزرب للفدَّانْ..

يمتَّنْ البنيان لدويرة لحزان.

التراب تسقيه بالما يحْنانٰ

يبني من الطين كْيانْ

ينبَّتْ فكف عطشانة كيسان

وفكف جيعانة طاجين

….

التراب كيتْمرَّغْ فالشمس

فجدور اللّفْتْ كيبنان

التراب للسواقي ميزان

وكتف للنبات فالشمش برودة

وفالليالي حمَّانْ

…

التراب وجعة،

وفراق،

ومسيرة أحزان

قالو: “ما يشبع التراب غير بالتراب”

والفم الجيعان تراب ما يعرف قياس

…

التراب يعمي إلى ساعف الريح فرشوقها

التراب يغني إلى لق للخاوة طريق

التراب رفيق… وتاريخ للانسان...