” بانضية” توفيق بوشري/ المغرب

را.. هم

شفتيهم؟

هادوك اللي

سرقو الكحل

من عيون أحلامنا

سرقو الجزء الحاسم

من بوزل puzzle

سمانا المرقعة

بصبر المحبة

حبة

حبة..

..

را.. هم!

هادوك

اللي دخلو بعروس

أمنياتنا حرام

فضو بكارة الأمل

حتى تعرى

من ريحة المستقبل

وكفر بالممكن بلا رجعة

سرقو اللحظة

المسماة قيد الصبر

تفاؤل

من خريطة أفكارنا

المعذبة

بالموت بلا نهاية

بحال شي لقطة

حاصلة عنوة

ف فيلم حكل وأبيض..

..

را.. هم

شفتيهم؟

هادوك اللي اغتصبوا

الاغتصاب

حتى تلف لينا الحساب

هادوك اللي لعبو

فالعذاب!

قتلوا الغايات

عزلونا ف كوابيسنا

قنعونا باللي

هي علينا مكتاب

ضيعونا ف تاريخ مقلوب

تالف ليه الساروت

واخا ما عند تنهيدتو باب!

..

را.. هم!

شفتيهم؟

هادوك اللي

خنقو السحاب

وسقاونا سم

حياة معبورة بالسراب

وحلينا أفامنا

ما حنا بعاد

ما قراب

كنجيو نهدرو

كيتعاود الكلام:

را.. هم!

شفتيهم؟

..

..

من ديوان زجل غير منشور بعنوان: وقت قاضي موتة