عبور ثقافية جامعة
راني نسول لله عطيوني جواب
يا أهل العلم والمعرفة جاوبوني
واش لي قال كلمة الحق حق ينعاب
قلتها في يوم وشي بعض عيبوني
شفت حتى لغزالة ترعى مع الدياب
ماگال لي حد راني شفت بعيوني
شفت الطاووس دارت لخاوة مع غراب
فرحانة تنزه معاه وتقول بغيتو وبغاني
وشفت الثعلب يجالس بعض الكلاب
والسبع محتاقرينو وحدو كايعاني
شفت في هاذ الدنيا لعجب والعجاب
على زمان شين مدلول فيه ربي تلاني
ودقت من كاس الغدر ديال الصحاب
على جوج ريال غبر وجهو مابقات راتو عيني
هاذي الدنيا وأخرتها گاع للحساب
يهرب هنا ويعيا ولهيه مجبور يلقاني
ويل بالويل لشي بعض من لعذاب
معذب حتى في الدنيا غي حالتو توريني
شنو ذنب عود الغابة الي حرقو الحطاب
نطق الما يبكي قال العود لي سقيتو كواني
في زماننا هذا ضبابة سموها السحاب
اش تفهم يامن ماتفهم قصد لمعاني
انا ماقريت ماتعلمت ولا نشرح كتاب
ولكن ربي عطاني فكر والزمان قراني
سعدك يامن تنعس ونومك طااب
وما أنا صغير صابني ربي وبلاني
نبات في فراشي نتقلب هذا ماكتاب
مشوش والخاطر مزيلف گاع ماهناني
منين كان السعد سعد وما ليوم غاب
نخطفها من فم سبع والكلاب گاع مايهموني
نهدي كلامي وسلامي وهذا من الصواب
نشكر الرجال اللي عرفوني ويقدروني
